देउसीभैलोको रकम विद्यालय र छात्रवृत्तिमा

त्रिशूली(नुवाकोट), ५ मङ्सिर । दाङसिङ गाविस वडा नं २ स्थित पञ्चदेवी कलादेवी निम्नमाध्यमिक विद्यालयका लागि देउसीभैलो खेलेर रकम सङ्कलन गरिएको छ ।

अभिभावक सोमबहादुर तामाङले तिहारदेखि छठसम्मको अवधिमा खेलिएको देउसीभैलोबाट रु ५५ हजार सङ्कलन भएको जानकारी दिनुभयो ।


विद्यालय व्यवस्थापन समितिका अध्यक्ष बौडे लामा र प्रधानाध्यापक विष्णुलाल श्रेष्ठको नेतृत्वमा स्थानीय बुद्धिजीवीको अगुवाइमा शिक्षक, विद्यार्थी र अभिभावक देउसीभैलोमा सहभागी थिए । विद्यार्थीको नृत्य टोलीले आकर्षक नृत्य र गीत प्रस्तुत गर्दै गाउँभरि देउसीभैलो खेलेको थियो ।

शैक्षिक सत्र २०६९ सालदेखि निमावि तह सञ्चालन भएको विद्यालयको भौतिक एवम् शैक्षिक जनशक्तिका लागि उक्त रकम खर्च गरिने विद्यालयले जनाएको छ । विसं २०५२ मा स्थापित सो विद्यालयमा हाल एक सय २५ भन्दा बढी विद्यार्थी अध्ययनरत छन् ।