काठमाडौँ, ४ मङ्सिर । नेपाल टेलिकमले ‘वाइम्याक्स’ प्रविधिमार्फत काठमाडौँ उपत्यकामा इन्टरनेट वितरण गर्ने भएको छ ।
उपत्यकाका ग्रामीण क्षेत्रलाई लक्षित गरेर टेलिकमले तारबिहीन द्रुत गतिको इन्टरनेट उपलब्ध गराउने प्रविधि ‘वाइम्याक्स’ मार्फत इन्टरनेट सेवा उपलब्ध गराउने कार्यलाई प्राथमिकताका साथ अघि बढाउन लागिएको हो ।
मङ्सिर १ गतेदेखि ‘वाइम्याक्स’ वितरण सुरु गरेको टेलिकमले हिजोसम्ममा छवटा कम्पनीलाई सो सेवा वितरण गरेको कम्पनीका सहप्रवक्ता राजेश जोशीले जानकारी दिनुभयो ।
चाडपर्वका कारण र नयाँ प्रविधि भएकाले यसमा ग्राहकमा जानकारी हुन नसकेको उल्लेख गर्दै चाँडै अभियानका रूपमा यस प्रविधिमार्फत सेवा उपलब्ध गराउने उहाँको भनाइ छ ।
कम्पनीले दिएको जानकारीअनुसार कर्पोरेट ग्राहकका लागि ५० प्रतिशतको प्रवद्र्धनात्मक सुविधासहित पहिलो चरणमा सो प्रविधिमार्फत सेवा उपलब्ध गराएको छ । यो सेवा बुटवलमा पनि चाँडै सुरु हुनेछ ।
सहप्रवक्ता जोशीका अनुसार कम्पनीले कति गतिमा कति आयतनको इन्टरनेट लिने भन्ने विषयले लाग्ने शुल्क निर्धारण गर्छ ।
दुईसय ५६ केविपिएस गतिको पाँच जिवी आयतनको सेवा लिनका लागि रु ६५० तिर्नुपर्छ भने सोही गतिको ३० जिवीको आयतन लिएमा रु २५०० तिर्नुपर्छ ।
त्यसैगरी एक एमबिपिएसको गतिमा १२ जिवी आयतनको सेवा लिएमा रु १३४० तिर्नुपर्छ भने सोही गतिमा ६० जिवी लिएमा रु ५१९० तिर्नुपर्छ । रासस
0 comments:
Post a Comment